حفل توقيع كتاب مدونات مصرية للجيب

السلام عليكم ورحمة الله وبركاته

حابه اعرفكم اني سعيدة ...سعيدة بيوم مكنتش احلم ولا اتخيل انه يكون بالجمال والروعه دى

في الاول ياريت رجاء مني اختكم انكم تدعوا لأمى بالشفاء ، ولانها فعلا السبب اللى خلانى اروح يوم الحفل الجميل ده لأنى بجد مكنتش قادرة اسيبها وهى مريضه

يوم الحفل


اليوم كان بالنسبالى سفر، واكيد السفر والرجوع فى يوم واحد بيكون شاق بالذات بقى لو كان لمدة 3 ساعات الا انه كان هين علشان كان معايا مدونة بورسعيديه جميلة جدا اكتشفتها من خلال الكتاب "دودى اهو ده عيبه " ، لما وصلنا بآمان الله إلى ارض المعز لدين الله حسيت بالفرق بين بورسعيد ، وجهنم الحمرا ...أأقصد القاهرة ، الجو كان جاف وسخن بشكل مخيف

مش هطول فى شرح اليوم بالنسبة ليا
لكن هتكلم من وقت مروحنا المكتبة ، كنت انا وداليا مكسوفين وعمالين نقدم خطوة ونرجع التانية ، المهم دخلنا لقينا اربع اشخاص منصفين بين النوعين بالتساوى ( يعنى اتنين بنات واتنين شباب هى حكاية يعنى) عرفت واحد منهم على طول المبتسم اللى هناك ده ايوة
احمد الصباغ

وكان الباقى ابراهيم معايا ..أو ابراهيم انا وانا وكانت فى بنت مش مدونة اسمها هبه وكانت حنان او حنين زى اسم مدونتها
الناس قالولنا ان الكتّاب لازم يحضروا الساعه 5 ونص ، عدت خمسه ونص وفى ناس بتيجى مش بأنتظام ، اول حد جه وعرفته على طول كان أ/ احمد القاضى يا مراكبى وكان جاى مخصوص من جدة مباشرة على مطار حفل كتاب مدونات مصرية للجيب ...شوفتوش كده ؟

ده احنا جدعان قوى يعنى ، ومسافة ربع ساعه لقيت المكتبة ممتلئه اول عن اخر ومفيش خرم إبرة تقدر تقف فيه وغير كده وفجأتن ..الاكسوجين راح ولم يتبقى سوى صهد انفاسنا ...وبقيت مش عارفه افر واهرب منين ، الظريف واللى لازم يحصل معايا فى اى مكان

شوفوا انا كده بتاعت مواقف مش اى كلام ، لما شوفت ناس مقدرتش اقاوم نفسى الا انى اخدهم بالحضن (بعيدا عن صراخ وينكى لما شافتنى ولمت علينا الناس وهى بتصوت وتحضنى ) وأفضى هذا الى خلع طرحتى اللى كنت مكلفاها الشئ الفلانى وقاعده اللف فيها
وبردو منجدتنيش غير البنت العسولة الجميلة الحلوة اللى بموت فيها وينكى باشا ( فوق السلم يا وينكى... انت فاهم يا جميل )


ارجع للناس اللى شوفتها وحبتها جدا وكانت اول مرة اشوفها ، شوفت ياسمين بينى وبينك بنت سكره زى العسل والله يا بنت انا بموت فيكى وشوفت مفقوعه مرارتها ورحاب آبى بنت بجد انتى زى القمر ودمك خفيف جدا ، وانوجتى يا اسمر انت يا كميل يا عسل وبسومتى اللى كل محد يقولها مدونتك ايه تقوله مش قادره يقوم متنح ...البنت دى هتجننى بأسم مدونتها وبردو مش قادرة .....، وبنوته كده صغنونه مش داخل دماغى والله انها دكتورة ..دى لمضة قوى وسكر ..الدكاترة رخمين ..بجد والله يا ميرو انا سعيييده انى شوفتك يا احلى لماضه


وشوفت ابو خالد اللى كنت بقوله بابا ولما اقول كده وحد معدى يبص ويقولى هو ده باباكى ؟ أقوله اه، ياه يا بابا والله مبسوطه انك جيت بجد انت جميل قوى قوى قوى ، وشوفت احمد سوووووووووو حاجه كده توليفه عجيبه مين الراجل ده؟ هو لسه فى حد كده طيبه واخلاق وخفة دم وشقاوة ...وسندوتشات فى الشنطه مرضاش يدينا حتى فتفوته ، واستاذ احمد الله عليك يا استاذ والله انا كل شوية اقرا التوقيع انت حاجه تفرح والله عيل مصرى ....انا نفسى اكون عيلة كده والله ، ولغاية دلوقت وبلا حسد الله اكبر الله اكبر انا مبهوره بأبناء سيادتك ربنا يخليهملك ويحرصهم من كل شيطان رجيم ...قولوا آمين ، وشوفت الاستاذ شمعى اسعد ..سعيدة بحضرتك يا فندم ، واحمد رفعت ..اة مش اول مرة اشوفك بس بكون سعيده وانا معاك يا صديقى وزعلت قوى انك مجبتش داليا ، الهوارى سلمت عليه وكل لما اشوفه بعد كده الاقيه بيشرب سجاير ، بس اللى امتعنى يا هوارى اننا صوتنا انا وانت وانجى كان اعلى من صوت التسجيل اللى جمبنا ....تحفة ، والراجل بتاع الساعه 6 ده شوفته وانا خارجه اشم شوية هوا بعد مخدودى احمرت وبقت حالتى طين ، يوسف المصرى والله والله والله سعيده انى شوفتك ..، مش هنسى الاحمديين اللى هما اساس الموضوع احمد البوهى و احمد مهنى....بشكركم

والاستاذ محمد مفيد فى الصميم بجد مش اسم مدونة وخلاص ...ربنا يبارك فيك ويخليلك العبدين بأذن الله ...وشوفت بجد واحده بعتبرها اختى الكبيرة مقدرش انساك يا جميل اوشا مكان فى القلب كانت ماسكه فيا اروح معاها وتروحنى الفجر ، كنت هعيط علشان تقتنع انى لازم اروح علشان ماما ( اوشا بنوتك حلوة وطعمه مووووووووت بوسيهالىىىى )

بشكر ضياء انه حضر الحفل معانا رغم انه عنده امتحانات وبيذاكر ..ربنا معاك يا اخويا

وشوفت تامر نبيل بجد سعيدة انى شوفتك ، وعلى فكرة معجبنيش ابدا الكومنت بتاعك عند الصباغ ده حتى لو مش عامل عمليه ايه يضايقك اساسا فى كده؟ مش هكرر الكلام اللى قولته بس هقولك انا سعيده انى شوفتك وسلمت عليك وسلامتك الف الف سلامه

طبعا انا مش هقدر افتكر كل الناس دنا سلمت على اكتر من 150 بنى ادم بس هقول لكل اللى حضر وجه الحفلة وكل اللى محضرش بردو ...شكرا

بجد شكرا قوى انكم اخواتى ...والله حسيت وانا بكلم كل واحد وواحده انه اخويا واختى ، ده فى ناس اول مرة اقابلهم واكلمت معاهم كأنهم عايشين معايا ...بجد انا سعيدة

طبعا الحفلة كان يشوبها بعض المضايقات سواء العامه او الخاصه بيا ، مهو الحلو مبيكملش لكن انا مش هذكر اي شئ ومش هفتكر اساسا لان الفرحه والسعادة كانت اكبر بكتير

وبردو اضايقت قوى لما راحو البورصه من غيرى ، كان نفسى بجد اكون معاكم بس انتو عارفين المشوار الصعب ، وصلنا بورسعيد الساعه الواحده بعد منتصف الليل وطبعا احنا بنتين صغنغنين لوحدينا يا حرام مع اننا نخوف اجدع تاكسى لكن انا مرضتش نروح كده لوحدينا واتصلت بأخويا جه وصلنى انا ودودو وبعد كده عينى مشافتش حاجه ...تقريبا اغمن عليا

معلش انا معرفتش اصور كتير ، كنت عايزة ابقى فراغ امشى ابص بعدسة عينى واسجل كل لحظه علشان منسهاش ابدا

كنت ممكن اكتب تقرير عن الحفلة ، لكن انا حبيت احكى عن اللى منى
أخر حاجه بقى ، لقطت اتنين معرفهمش خالص ماسكين الكتاب وبيقروا بنهم عمرى مشوفته وعلى السُلم مقدرتش اقاوم ...قومت مصوراهم وبعد مصورتهم استأذنت ...مكنش ينفع افوت ولا اخليهم يمثلوا كانوا طبيعيين جدددا ، وبشكرهم انهم وافقو







اكتر شئ اسعدنى اننا يا كتّاب الكتاب اشترينا الكتاب ...والنسخ بتاعت اليوم ده كلها اتباعت هوا ، يارب بجد تخلص من كل مكان ، الناس دى فعلا تستحق ، واحنا كمان نستحق ان الناس كلها تشوف كلامنا اللى بيتقال عليه .... فى كتاب

معلش بقى اخر حاجه ...بهنى كتّاب كتاب عندما اسمع كلمة مدونة ولون كتابكم غالى قوى يعنى .....
هرجع لكم بموضوع تانى عن ما يحويه كتاب مدونات مصرية للجيب وكلام عن كل بوست وتعريف بأذن الله بصاحب البوست
كانت معكم شيماء الجيزى من قدام الكمبيوتر بتاعها اخيرا .....