وضاع العمر يا بنتى

تمخمخت فكرة عبقريه فى نفوخى المشع بضوء الزكاوه ان اكتب عن الشباب وبما اننى واحدة من هؤلاء وتلك فكرت ان اكتب ببساطه شديدة وافكر ايضا بمنتهى البساطه والحياديه ليه لاننى سوف اتحدث عن الفروق الواضحه فى الفتاة المثقفه والفتاة الغير مثقفه من وجهه نظر الشباب الذكور ...مش ناقصه غباوة الله يكرمكم ...اشطه

نبتدى توضيح الفروق

بس الاول حابه اقولكم إن الشباب بردو انواع فيه الشاب المثقف بس مهيس بمعنى انه مطلع وقارئ له فكر بس مدى على تهييس شويه

فكر مثلا فى مصاحبه الفتيات..فكر فى شرب السيجارة الملغمه ..فكر فى تثبيت امه وابوه ..فكر فى المذاكرة والسقوط وخلافه

ده بقى شايف ان كله بينفع والبنت العبيطه تنفع فى اليوم الى مفهوش بنات والبنت المثقفه المهيسه دى معاه على طول الخط اما لو هو فايق وضاربله كتابيين فى العضل فيستحسن البنت المثقفه الجد يعنى هو على كل لون يا بتستا

ومش فارقه معاه بس شايف احسنهم المهيسه عشان العبيطه مش هيسلك مع عبطها وهيزهق والمثقفه هتفلق دماغه طول الوقت

اما بقى الأخ الروش الشاب الى مقضيها الى لا بيقرا ولا بيكتب وده بقى ممكن تسأله على اسم امه ميعرفوش

"صعايدة يعنى"

وده يكره المثقفه لانها بتحسسه بجهله وشايفها بنت معقده وواخده الحياة وش ..اما المثقفه المهيسه فديما فقساه ومش عارف يشتغلها ابداً وبيحاول يبعد عنها الا بقى لو حفظله كلمتين وحاول يجرب قدراته وهو بيتقبلها عموما اما بقى البنت العبيطه يعنى الى هى ميح زى الاخ

بيكونوا بيدوروا على بعض فى هذه الدنيا الواسعه وعندما يتلاقوا بيتلاقوا فى كل حاجه ويمكن يتجوزوا ويخلفوا عيال زيهم

اما بقى الشاب الى مش عارف حاجه فى اى حاجه وبيحاول يقنع الى حوليه انه ابو العريف وفاهم ومثقف وعايش وشايف وثورجى وضد الشعب قصدى ضد الحكومه ده بتعجبه البنت العبيطه لانه بيقدر يعيش معاها فى دور المثقف ويقنعها بالكلام يعنى من الاخر بيعرف يشتغلها اما الاخروون فبيعرفوا يعملوا له ...استوب

ونيجى للأستاذ المثقف وده بقى الى طلع عجيب لانه يجب البنت المثقفه الى ليها فكر ويقدر يتكلم ويتناقش معاها وبتسعده جدا وبيكونوا اصدقاء جيدين على الاقل وايضا المثقفه المهيسه بيحاول يبنى معاها حوار ما بين الهزار والجد ويستفيد منها بمعلومه ويفيدها وبيكونوا بردو اصدقاء كويسين بس عند الحب والجواز بيختار الغير مثقفه او الى حدود عقلها ضيقه

"العبيطه يعنى "

وده لانه راجل عاوز هدوء عشان يقرأ ويكتب ويتفلسف وطبعا الاخت دى مش هتتحشر وتتناقش وتتكلم وتتعب دماغه اكيد هتلتزم الصمت افضلها فهو بيريح دماغه ويتجوز واحده اكبر تطلعها انها تسأل صحبتها عن اكله حلوة او تقعد تغسل الغسيل

والكلام ده مش كلامى ده أرء شباب زينا كده بس شباب ذكور

"قولنا مش ناقصه غباوه"

انا عارفه طبعا ان فى ناس مش بتفكر كده ومش بقول المعظم بس ده فعلا موجود ..وناس كتير شايفه ان كلامى ده هو الصح او هو ده تفكيرهم

والى طلعت بيه من الموضوع ده ان نسبه العنوسه فعلا فى تزايد وبقت كبيرة بين البنات ...واكبر نسبه عنوسه فى البنات بقى

هما المثقفات

يعنى معنسه معنسه معنسه ....وضاع العمر يا بنتى

إمضاء

مثقفه معنسه