الثلاثاء، ١ مايو ٢٠٠٧

المدونــــــــون يتكلمـــــون

فى اولى حوارات " المدونــــون يتكلمــــون " فكرت كثيراً فيمن ابدأ ، فلم اجد غيرها
هى من تتحدث من داخلها ..تتكلم عن وجع تجده عندى او عندك ..إحساس هو إحساسى وإحساسك
هى صديقتى الجميله الحنون...الأخت والأم
هى من تكلمت عن الحب ..وعن النساء فى الحب ..هى من أسميتها
"زعيمة البلوجرز"
هى ياسمين
صاحبة مدونة
سكاى لايت
==================
مستعده؟
تمام يا فندم
----------------
نبتدى
اهلا بيكِ يا ياسمين فى اول حلقات المدونون يتكلمون
اهلا بيكِ وبكل المدونين

عاوزين منك بطاقة تعارف؟

ياسمين عمرو -( مش اسمى الحقيقى) ،36 سنة ،متزوجة وعندى بنتين ،نور الكبيرة عندها 4 سنين و4 شهور ،سما الصغيرة عندها سنتين و 11 شهر، بكالريوس إعلام، صحفية فى جريدة الأسرة العربية

إيه قصة إنشائك للمدونه ..والاسباب؟

انا بكتب من زمان وبحب أسجل دايما مذكراتى وبكتب شعر وقصص قصيرة لنفسى ، ودايما جوزى كان بيشجعنى انى أنشر اللى بأكتبه وفى يوم جه قالى انتى ليه مش عاملة بلوج ؟ ..
ودى اول مرة كنت اسمع فيها عن البلوج اصلا ، شرح لى ايه هو البلوج وفعلا عملت واحد لنفسى على الياهو 360 درجة ، هو موقع البلوجر على الياهو

كتبت بوستين بالعدد ولم اشعر بتفاعل من المدونين الاخرين وكانت البوستات تحت اسم " الطلاق الناجح " لكن جالى تعليقات قليله جدا والاهتمام كان لا يذكر
وده احبطنى شويه ..

وفى يوم كنت مع بعض الأصدقاء وكان معاهم بنت أول مرة اشوفها اسمها سمر ، اتكلمنا على الكتابه وعرفت انها بتحب الكتابه واعطتنى عنوان المدونه بتاعتها
دخلت فعلاً على مدونتها على وعد انى اقولها رأيى فى كتابتها ...بعد كام يوم من التصفح فى مدونتها ومدونات الآخرين من خلال التعليقات قررت اعمل مدونه

قوليلى يا ياسمين ...المدونه بتعتبريها جزء من حياتك؟

جزء كبير جدا جدا ، أنا وقعت فى غرام التدوين

طب وتأثيرها فى حياتك ...بالسلب او بالإيجاب؟

بتاخد من وقتى كتير فعلا ودة الشىء السلبى الوحيد تقريبا ، لأن ساعات بحس بالذنب تجاه البنات وانهم المفروض يبقوا .. أولى بالوقت دة
لكن فى الوقت نفسه انا بقيت أكتب ، والناس بتقرأ ليا وبتتفاعل وتقول رايها ، ودة إدانى ثقة أكبر فى نفسى اكتشفت من خلالها ان لية آراء كتيرة صح
وكمان أسرة التدوين بحس من خلالها ان لية عيلة تانية حقيقية ، بتلاقيهم بيحبوكى ويخافوا عليكى ويسألوا عليكى ويقفوا جنبك وقت الشده ....

طيب انا لاحظت انك بتتكلمى كتير عن الحب ..هل انتى كنتى محدده طريق لموضوعاتك قبل متنشيئ المدونه ولا ده كله نابع من احساسك؟

لا هى مسألة احساس بجد ، اللى بيخطر على بالى بفتح المدونه واكتب على طول ، وعمرى ما بكتب برة الأول .. غير فى حالة كتابة الشعر ، بكتب القصيده الأول بره لحد ما تخلص وبعدين انشرها ، أما باقى الموضوعات كلها بلا استثناء وليدة اللحظه

كنتى فى كذا موضوع ساخطه على الرجل ...قوليلى ايه هو الرجل من وجهة نظرك؟

الرجل ضحية مجتمع... إداه أكتر من حقه فى المسئوليات والوضع الإجتماعى والأسرى والعملى كمان ، وبالتالى انعكس دة فى سلوكه تجاه المرأة ونظرته ليها
لأن المرأة بالنسبة لأغلب الرجال مجرد متاع زى الكرسى أو الكنبه ، مايحبش يفرط فيها... لكن فى نفس الوقت ليست لها اى حقوق انسانيه أو آدميه عنده

بمعنى... تسمعى دايما المتزوجين من الرجال يصف زوجته انها نكديه .. وده أكبر دليل على عدم احترام مشاعرها او حتى عدم إعتبار إنها من حقها ان تغضب او تحزن او تبكى .. فى الحالة دى تبقى نكدية....!!!!
مشاعر الحزن ليست من حق المرأة..!!

هل ليا ان اعرف اسباب تكون الفكره دى عندك؟
سؤال صعب قوى على فكرة
بس انتى عارفه ان الفكره دى هجوميه على الرجل ومش معظم النساء عندهم وجهة نظرك...؟
طيب انتى مش هتصدقى لو قلتلك ان كل المتزوجات لهم نفس النظرة أو على الأقل غالبيتهن ...و لو سألتى اى امرأة متزوجة هتلاقيها عندها نفس الفكرة بنسب مختلفة وبطرق تعبير مختلفة...!!!!
وردى على سؤالك ...ان التربيه والثقافه هى السبب
هل تطالبين بحقك دوماً؟
بحاول .. وبأفشل
والعتاب... امتى بتعاتبى؟
دايما بعاتب لما باكون مش قادرة اتحمل ، انا حموله وصبوره قوى وده بيزود المشكله لأنى باصبر لحد ما انفجر
وساعتها الإنفجار بيكون مدوى وبيدمر كتير فى طريقه
لو مريتى بأزمه او مشكله وعارفه انك هتاخدى فيها قرار صعب جدا بتعملى ايه؟
هل بتاخدى القرار رغم العواقب ولا بتتراجعى؟
قراراتى دايما بآخدها بعد استنفاذ كل طرق الحل لما تكون فى مشكله ، وكتير بانحنى لحد ما العاصفة تمر ، مش بحب آخد ريسك اصلا فى حياتى ولو أخدته بيكون لأسباب خارجة عن ارادتى
الاحساس بالخيانه ...بيمثلك ايه؟
ألم كبير لا ينتهى ....وقد ينتهى بإنتهاء الفعل
الحب والجنس ..وجهان لعمله واحده ..ما صحة هذه العباره؟
صحيحة مية فى المية
انه من حق المرأة ان تبوح بمشاعرها وحاجتها للحب والجنس ...ايه تعليقك على العباره؟
أكيد ، ولازم وضرورى
تعرضتى لعدة قضايا فى مدونتك مثل التحرش الجنسى وتعدد الزوجات وحقوق الزوجه واخيرا الطلاق...
هل تعتقدى ان مثل هذه القضايا الحديث فيها قد يأتى بحل لها؟
الحل السحرى غير وارد بالمره ...احنا بنقول وهنفضل نقول ونعيد والأمل ان نسبه من الناس يفهموا وتزيد النسبه دى مع الأجيال القادمه... ويمكن بناتى يكبروا فى مجتمع بيفهم أكتر ويحس أكتر بالمرأة ومشاكلها ويعتبرها نصف المجتمع فعلا ولما يتجوزوا يلاقوا سعادة ...ما لقينهاش احنا فى جيلنا
الامل كمان فى عقول الرجال اكبر واكبر ...زى الحمله الى عاملها محمد حمدى ...هو فعلا شاب فى منتهى الوعى

اعتقد انها بتكمل حملتك؟
دى حقيقه ....أنا بأحييه من هنا من عندك
طيب ليا سؤال
اتفضلى
انتى تقدرى تعملى طلاق ناجح؟
اقدر قوى
أنا عشت الطلاق ... بمساوئه كإبنة وعارفة ايه اللى بيؤذى الأبناء كويس قوى واقدر اتجنبه ، كمان عارفة بيبقوا محتاجين ايه وعارفة وفاهمة نظرة المجتمع اللى بتأذيهم ، انا فاهمة الموضوع قوى على فكرة
على فكره واضح جدا من خلال كتابتك
دى مش مجرد كتابات، ده كله نتاج تجارب شخصية تمسنى أو تمس إلي حولى من المقربين
طيب تفتكرى فى تصورك ، نجاح حملة الطلاق الناجح هتكون بنسبه اد ايه ؟
هتكون فى نطاق المدونين طبعا وهم قلة بالنسبة لمجتمع كبير... لكن علينا أن نبدأ بالقليل يمكن هم نفسهم يبقوا دعاة للطلاق الناجح !!
الموضوع مش سهل خالص وفيه جهاد كبير مع النفس ومقاومه لحب الذات ورغبة الإنسان الطبيعية فى الإنتقام
ولو حددت نسبه يبقى لو 5% من القراء حاولوا معايا يعملوا طلاق ناجح يبقى أنا نجحت ، لو حالة واحدة شفتها بتعمل دة يبقى انا برضه نجحت
مين المرأة الى محتاجه بجد انها تتوجه عشان تفهم حقوقها ؟
كل امرأة بلا استثناء مهما ارتفع مستواها العلمى أو الثقافى أو الاجتماعى أو المادى
كل امرأة يا سيدتى فى مجتمعنا محتاجة ده .. وبشدة
مش عشانها .. لأ .. عشان جيل من الذكور إتربى بطريقه خطأ..والطريقه دى ظلمته قبل أن يظلم الآخرين ..هو يظلم نفسه ويدفع ثمن سيطرته وظلمه من رصيد سعادته الزوجية
طيب الحقوق الخاصه بالحياة الزوجيه ؟
الحياة الزوجية حياة فيها نوع من التكامل يعنى الراجل برضه يا جماعة لازم يتدلع فى بيته .. لازم الزوجة تراعيه وتحبه زى ابنها وجوزها وعشيقها وحبيبها وصاحبها وابوها واخوها...
الزوج عشيرة كاملة بالنسبة للمرأة ، لو حس بدة ممكن الحياة تبقى افضل ، وهى هترتاح لما تريحه
يعنى انتى شايفه ان الزوج بردو مش واخد حقوقه الزوجيه؟
فى كثير من الزيجات الست فيها بتكسل أو بتستسلم .. مش عارفة ، بس انا احب البيت يكون على سنجة عشرة مع دخول الزوج وكمان الست والأبناء
الراجل ضيف على البيت يا جماعه ولازم يتعامل معاملة الضيوف من ناحية الإهتمام والترحيب..!!!
هل فعلا نسبه كبيره من السيدات لا تطالبن بحقوقهم الزوجيه ؟
وامتى فعلا المرأة تطالب بحقوقها فى الحب والجنس؟

نسبة كبيرة جدا ....فى ستات اصلا ما تعرفش حقوقها ودول كتير فى الريف والمناطق الشعبية
اما امتى فأعتقد ان الست لازم تطالب بده عند شعورها ان فى حاجة غلط أو حاجة هى محتاجة ليها أو لما تحس انها مش مبسوطة ولا تحصل على الإشباع الكامل من العلاقة.
الإشباع على فكرة عند الست جنسى وعاطفى بنفس القدر
لو لم تستطع المرأة أن تحصل على حاجاتها العاطفية اصبحت بلا هوية .. ودورت على جنس مبتور والسلام
ايه رأيك بالمنظمات المعنيه بحقوق المرأة ؟
كلام فى كلام
انا شخصيا كنت عضوة فى المجلس القومى للمرأة
وعضوة فى جمعية المراة الجديدة

يعنى شايفه ان الجمعيات والمؤتمرات دى مش بتؤدى الدور المنتظر منها؟
بصراحة آه
كلها مجرد لافتات لا تبحث فى لب الموضوع ولا تخاطب رجل الشارع العادى .. هم بيتكلموا مع بعض بجد مش بيتكموا مع الناس
لكن بصى ... هم كويسين فى تنفيذ وسن القوانين ، زى ما حصل بخصوص موضوع قسيمة الزواج الجديدة ، لكن لا يساهمون فى تغيير الثقافة السائدة باى حال الا من خلال سن القوانين وبس
والدليل...مازالت البنات تختن فى السر حتى الآن..!!!
طيب لو مسكتى رئاسة جمعيه معنيه بحقوق المرأة ايه الى ممكن تنفذيه من خلالها؟
الناس مش عاوزه اللى يكلمها بالقلم والمسطرة ، لازم تروحى تقعدى معاهم فى بيوتهم على الطبلية
وتشربى معاهم شاى فى الخمسينة وشقة عيش وجبنة قديمة ، وتكلميهم وانتى بتاكلى معاهم..
وأنا هدفى على فكرة الراجل قبل الست ..ودة هام جدا بالنسبة لى لو كنت رئيسة جمعية للمرأة

طيب نتكلم شويه عن المدونين
اتفضلى
تفتكرى ليه معظم الشباب المثقف اتجه للتدوين؟
اعتقد انهم كانوا بيكتبوا اصلا من الأول وكل الحكاية ان التدوين انتقل من الصفحات الورقية للصفحات الالكترونية
اللى بيعبر عن رايه واللى بيعبر عن مشاعره واللى بيشارك بىرائه فى حل قضايا اجتماعية وسياسية وخلافه
يعنى متفتكريش ان ده هروب من النظام والروتين؟
لا أعتقد انه هروب .. عمر ما التدوين وكتابة المذكرات كانت هروب ، دى ناس بتواجه بس بطريقة حضارية
تفتكرى ان التدوين يجب انه يلتزم برقابه ..مثل الرقابه الحكوميه ؟
على فكرة انا بكره الرقابه الحكوميه ، لكن لازم بيقى فى رقابه من الضمير نفسه ، بمعنى .. اننا احنا كمثقفين يجب أن نراقب انفسنا
أنا باعترض على استخدام ألفاظ خارجة فى التدوين و بأعترض على الأفكار الهدامة ، وعلى فكرة احنا نفسنا كمجتمع مدونين بنعمل رقابة خفية على نفسنا
لما بيخرج مدون عن الخط المرسوم بيبتعد عنه تلقائيا باقى المدونين .. لاحظت دة فى أكثر من مدونة...!!
طيب هل انتى شايفه ان من حق اى انسان يدون ...؟
أكيد .. بلا شك
مهما اختلفت اغراض التدوين بالنسبة له؟
بلا شك
حتى لو كانت تخالف الاعراف ؟
من حقك أن تدون .. ومن حقى أن أنقد واعترض على بعض الكتابات ، ده حق مش ممكن انكره .. وزى ما قلتلك لو خرج عن الخط هيبقى جابه لنفسه ويمكن انه من خلال المدونين الاخرين يرجع ويراجع نفسه ، دى فرصة عشان نغير أفكار بعض .. والخير فى نفوس البشر هو الغالب دائما .. و وازع الضمير والصح دايما موجود لأبد الابدين.
ايه حلمك للمدونين؟
الجمعية المصرية للتدوين ، باحلم انى أعمل جمعية للمدونين ، الحلم دة بدا مع تنآمى اللقاءات اللى عملتها مع المدونين
رغم اعتراض كتير من المدونين على وجود جمعيه للمدونين ؟
الجمعية هيبقى فيها أعضاء .. احنا عددنا يتراوح بين 7000 الى 10000 مدون مصرى
فى منهم كتير بيؤيدوا الحلم دة ، وبيشجعونى جدا
يعنى أول لقاء عملته يا شيماء حضره 6 مدونين ، آخر لقاء حضره 60 مدون ...!!
مش برضه انجاز ولا ايه؟ ، مش برضه لازم يبقى لينا شرعية ونظهر فى حيز قانونى ؟
انا ناقشت الفكرة مع ناس كتير وعلى فكرة اللى اقترح الفكرة المدون الجميل محمد عادل صاحب مدونة مصر هى أمى
وأنا لقطتها بسرعة ونفسنا ننفذها ، قانون الجمعيات بيشترط ان يكون عدد العضاء على الاقل 10 أعضاء
تفتكرى ما فيش 10 مدونين موافقين ومؤيدين للفكرة؟
بعد كدة اللى يحب ينضم أهلا بيه واللى ما يحبش برضه زميل تدوين عزيز
طيب لو تحققت الفكره ...وصدقت مقولتى فى انك زعيمه للمدونين ..هل بالفعل ترشحى نفسك كرئيسه للجمعيه؟
هأرشح نفسى طبعا .. ومش هأزعل لو ما كسبتش .. المهم الحلم يخرج للواقع لأن أكيد هيكون لية دور تانى برضه من خلال نشاط الجمعية
هيبقى عندنا لجان مختلفة ، ثقافية وفنية ودينية وسياسية واجتماعية وادبية
عاوزاكى تقولى مفهوم لكل كلمه ؟
الحب:
مشاعر انسانية تلقائية لا ارادية
المرأة:
نواة لكل نجاحات الرجل بس هو مش فاهم لسة
الرجل:
حضن كبير واحتواء
الحياة:
بعيشها سواء رضيت ام لم ارضى
الام:
حنان وحب وتربية وثقافة وكل شىء بيؤسس فى الطفل وكل فكرة سلبية أو ايجابية وكل اتجاه وكل شخصية
الاخت :
الأخت دى بالنسبة لى كل أهلى ، أختى هى كل أهلى بجد
الابناء:
مسئوليه كبيرة وحلوة وحبهم لا يعادل حب اى شىء فى الكون
المدونين:
اسرة كبيرة .. اصدقاء واخوة فى التدوين .. مجتمع زى أى مجتمع فيه الصالح والطالح فيه الخير وفيه الشر .. بشر بيغلطوا ويحبوا ويكرهوا ويعيشوا ويتخانقوا ويغضبوا ويختلفوا .. بشر .. هو مجتمع بأكمله
الجنس:
اساس الحياة وده ربنا عمله رغبة عارمة من أجل بقاء النوع .. شهوة قوية وغريزة لا حدود لها
الطلاق:
شركة أفلست بعد نفاذ رصيدها من العواطف
كلمه تقوليها للى بيفكر يدون ؟
أى حد عاوز يدون بقوله ادخل .. تعالى .. هتحبه ... بقول انه احلى من اى حاجة تانية من طرق التواصل على النت .. افضل من التشات اللى بيضيع الوقت وأحلى من المنتديات وخلافه
التدوين شىء رائع بجد
الاسئله كده انتهت ...بس عاوزة منك بقى حاجه جديده محدش يعرفها ...متعلقه بالمدونه او لقاء المدونين ..نتزل مع اسئلتك ... سبق صحفى يعنى
برنامج البيت بيتك عمل معايا مقابلة بخصوص التدوين واللقاءات وعاوزين ييجوا يصوروا اللقاء القادم
ايه رأيك فى الاسئله والحوار؟
انتى هتبقى صحفية لامعه يا شيماء وابقى افتكرينى*
لأ بجد حوار فى منتهى الخطورة*
-------------------------------------
ده كان اخر جزء فى الحوار ...بشكرك يا ياسمين على كلامك
اتمنى ان الحوار ينال اعجابكم
ليا طلب محتاجه رأيكم
اسيب الحلقات تنزل فى المدونه عندى
ولا اعمل مدونه جديده
بإسم الحلقات
مستنيه ردودكم
المدونـــــون يتكلمــــــــون
كانت معكم

هناك ١٠٢ من التعليقات:

بسمه عبدالباسط يقول...

بجد موضوع هايل جدا يا شيماء وبيقربنا من بعض أكتر
وأحسن حاجة كمان ان أول حوار كان مع ياسمين
وأنا كمان بقترح معاكى أن الموضوع ده يكون فى مدونة لوحده هايكون أحسن
ياسمين الجميلة بجد أنتى هايلة
شيماء أنتى عبقرية فى أختياراتك

أسوور يقول...

متهيألى ان فكرة عمل مدونة خصيصا للحوارات هيرهقك شوية لكن هى فكرة كويسة

بس ممكن برضه تنزلى الحوارات على المدونة الفرعية ومدونتك فى نفس الوقت
لحد ما نعملها شوية دعاية

اشكرك يا بوس بوس
اخجلتمونى بجد يا جماعة

Unknown يقول...

ممكن تعملي بانر في ال
sidebar
للمدونة الجديدة لغرض الدعاية

أنا مع فكرة مدونة منفصلة برده

تحياتي

الملاح التائه يقول...

الله على الكلام
الحوار ده مفاجأة بالنسبالي يا شيماء
مفاجاة بجد
وأحب أحييكي على اختيار الضيفه حقيقي أحسنت البدء
وأحب أرفعلك القبعه على الأسئلة غير التقليديه والدالة على حس صحفي مش عادي
وأحب أقولك خليكي هنا
ماتروحيش مدونة تانيه
هنا جميل
تحياتي بعنف
الملاح

محمد حمدي يقول...

جميل انى من اول المعلقين

الفكرة :

ممتازة وبجد هتعمل صدى رائع وتقربنا من بعض كمدونين على الصعيد الانسانى

المحاورة :

متابعه لمدونه الضيف , اسئلتها جميله ومتنوعه , بتقرب من مساحات محدش قرب منها قبلها

الضيفه :

يكفى اقول انها ياسمين ؟ متهيالى فعلا يكفى عشان ياسمين بقت مرادف للكلمه الجريئه والقلب الحنين والتحليل المظبوط والنصيحه الى مش بتبخل بيها على حد

موضوع فتح بلوج جديد :

بلاش يا شيماء عشان مش كل حاجه جديدة نفتحلها بلوج جديد , دة بيخلق أن بيكون فى مدونات كتيرة وضعيفه مش قويه ... لاسباب زى دى ربنا خلق خاصيه التاج عشان تجمعى مجموعه مقالات تحت تصنيف واحد بس , لكن لازم تنوعى ومتنزليش كل الحوارات ورا بعضها

حاجه ملهاش دعوة بكل دة :

انا موجود وبقرالك وبكتب تعليقات عندك اهو , يبقى بلاش نوايا وحشه يا أختى العزيزة

سلام

غير معرف يقول...

شيماء
انتي عبقرية بجد
اسئلتك فعلا هايلة وبجد مش ينفع اي حد يجاوب عليها غير ياسمين

اخرتي واحسنتي الاختيار

انا بقول طالما انتي هتعملي الموضوع دة علي طول يبقي اعمليلها مدونة تانية

وتواظبي عليها

بجد هايلة
وياسمين كمان رائعه

وياسمين مش تعملي القاء الا بعد ما اخلص امتحاناتي لاحسن انتحر

YHYيــوســف الـمصـرى يقول...

فكرة ممتازة اختى شيماء وتنفيذ اجمل الحوار جميل جدا
وخير بداية فعلا ان ياسمين تبقى اول ضيفه
انا لا أأويد انك تعملى مدونة تانية للموضوع لأنك هتظلمى نفسك بين الاثنين خلى الموضوع فى مكان نشأته هنا كده وزى الفل ...
ويا ترى مين الضيف الى جى ؟

The Alien يقول...

الفكرة حلوة جدا
والحوار كان جميل
واضح إنك متابعة كتابات ياسمين
ودا مهم قبل ما تعملي حوار

بخصوص مدونة جديدة
معتقدش دا هيفرق كتير

تحياتي

محمد عبد الغفار يقول...

مش هتفرق مدونتك مدونه مخصوص المهم تتكمل وان كان مدونه مخصوص افضل لأضفاء نوع من التركيز

وفى انتظار لقائات مع مدونين اخرين ونتمنى ان يكون عندنا فى النهايه تشكيله من كل التيارات والأتجاهات ليكون فى النهايه كشكول تعريف بالمدونين

سهر الليالى يقول...

اختيار موفق يا شيماء فكره المدونه المخصوص وفكره الحوار واختيارك لياسمين بجد تحيه كبيره لاختياراتك الموفقه الحوار انا شايفاه حوار شامل ومكتمل عناصر اعداد الحوار الصحفى معلش دارسه اعلام بقى:)وبالنسبه لياسمين ردودها كالعاده قويه ومقنعه وجريئه بدون اباحيه
تحيه كمان للزعيمه ياسمين
وتمنياتى بالتوفيق

شيماء الجيزى يقول...

bos bos

بشكرك جدا يا بوس بوس على رأيك الجميل
انتى اول حد يرد والله سعيده بيكِ
وياسمين فعلا من الناس الى كلنا بنحبها
وانا بشكرها تانى وتالت ورابع ومليون
عشان هى فعلا كانت نعم الصديقه
والضيفه اللذيذه جدا
======================
يـــــــاسمين

يا اهلا بالانسانه الرائعه
كنتى جميله وصادقه وردودك كانت مقنعه فعلا
غير انك جريئه فى ردودك
ومتشكره جدا على مساعدتك ليا فى الدعايه
وبفضلك فى ناس فعلا حطت الاعلان فى مدونتها
شكرا ليكِ
تحياتى
====================
IRC President

ازيك اخبارك ايه
والله انا جاهله فى الحاجات دى
انت مسمعتهمش وهما بيضحكوا عليا فى الندوه؟

تحياتى ليك وشكرا لزيارتك
===================

شيماء الجيزى يقول...

الملاح التائه
اخجلتنى
ايه الكلام ده كله عليا انا؟
طبعا انا بشكرك جدا جدا
على كلامك ده بجد
تحياتى بعنف؟
ليه بس العنف؟
:d
تحياتى لوجودك الجميل فى مدونتى
===================
محمد حمدى
يا هلا بالاخ العزيز
انا سعيده جدا ان الحوار عجبك
ودى شهاده من اخ وصحفى جامد جدا
انا بعتبرها وسام على صدرى
وانا كنت زعلانه منك
لانك مكنتش بترد على موضوعاتى الاخيره
بس بما انك رديت
فانا خلاص مصلحاك
وانا بحييك من هنا بردو
زى مياسمين حيتك ..
اه كنت عاوزة اقولك
ان ياسمين هتعينك على طول فى الجمعيه
وهتعينى المتحدث الاعلامى
:d
تحياتى يا احلى اخ
============================
سمررررررررررراء

انتى الى هايله فى ردودك
وفعلا انا متأكده انى احسنت الاختيار
والاسئله اساسا لياسمين مخصوص بعد مدرست مدونتها
كده كام يا سمرا
4 :2
للزمالك
:d
احم احم
سورى لمدونه منفصله
تحياتى يا قمر

شيماء الجيزى يقول...

yhy

اهلا بيك
بجد بشكرك على تعليقك الجميل
ولون كده انت زودت عدد الى رافضين مدونه تانيه
يعنى كده 4:3
بردو لمدونه منفصله
الضيف الجاى؟
انت عاوز تعرف المفاجأه ولا ايه
:d
استناها
تحياتى
===================
The Alien
بشكرك جدا
وسعيده ان الفكره عجبتك
وفعلا انا لازم اكون متابعه
غير كده انا درست موضوعات ياسمين
قبل محط الاسئله
كده 4:4
فى تعادل يا جماعه
تحياتى ليك
وشكرا لزيارتك مدونتى
===================
محمد عبد الغفار

انا اتمنى زيك بالضبط ان
يكون عندى مجموعة حوارات مع معظم المدونين
هتفيد بجد
مستقبلا فى التدوين

كده 4:5
لمدونه منفصله
تحياتى ليك
================
سهر الليالى
اشكرك يا سهر على تعليقك الجميل
انا عاوزة الناس الى دارسه للصحافه
اصلى انا فى سرك مش دارسه
مجتهده بس
انا من عندك بحيي ياسمين
هى فعلا اختيار موفق
تحياتى ليكِ يا سهر
كده 6:4
لمدونه منفصله
.........
===================

Esmeralda يقول...

حلوه الفكرة يا شيماء و ربنا يوفقك
اعملى احسن بلوج منفصل
عشان تبقى اللقاءات مجمعه مع بعضها

Tamer Nabil Moussa يقول...

فكرة جميلة جداا

ربنا يوفقك

تحياتى

Reemo يقول...

أولا يا شيماء انا كمان مع ياسمين انتى هتبقى صحفيه ناجحه وبكره هتشوفى
ثانيا ياسمين بجد انا بيعجبنى فيكى نضجك
انا كنت قلتلك رايى فى موضوع الطلاق الناجح قبل كده فى مدونتك
بس مش عارفه النهارده حسيت من كلامك انه ممكن جايز يكون صعب بس اكيد مش مستحيل
اجاباتك كانت جرئيه وسليمه وبيتوضح عقل ناضج واعى مدرك للكلام اللى بيقوله مش مجرد هتافات وبس
انا حاسه انى بشعر فيكى بس انتى بجد اديتينى امل انا كنت محتاجاه
مش عارفه اتكلم عنه بس كل اللى اقدر اقوله انك ساعدتينى فى وقت صعب عليا من غير ما تقصدى كلامك ساعدنى نوعا ما ان فى امل فى التغيير
سيماء انا بؤيد موضوع مدونه منفصله للحوارات فقط بس تهتمى بيها
اختيارك بجد رائع وجميل
انا فرحت اوى لما لقيتك كاتبانى كلمات ريمو صاحبتى لانى بجد اعتز بانك تكونى صديقه عزيزه عليا
ربنا يوفقكم
تحياتى

safa7_karmooz يقول...

الحوار تحففففففففففففه بجد

انا بس بحجز مكان...وارجع ااكون فايق من الارهاق ده ..:)

eldoctor يقول...

اظن ان انشاء مدونة خاصة لن يأخذ وقت كبير و هو فكرة تستحق الدراسة .. و يمكنك اختيار ضيف كل اسبوع أو كل شهر حتى
تحياتى

wayfarer يقول...

حوار جريء
و فكرة رائعة
و في انتظار المزيد
و لا أجد مانعا في ان يظل هذا الحوار بداخل مدونتك
و لا حاجه لمدونة جديدة
تحياتي

أسوور يقول...

ريمــــو
طبعا انا باشكرك على الكلام الجميل دة
وسعيدة بيه جدا
كنت بصراحة خايفة من الحوار دة شويتين عشان انا بطبيعتى مش باعرف أقول رأى مش رأيى وخفت ألاقى هجوم
بس الحقيقة كل المدونين اللى جم قالوا أحلى كلام .. كتر خيرهم

انا مبسوووووووووطة قوى انى ساعدتك فى أى حاجة فى حياتك .. تعليقك خلانى فهمت شوية بس محتاجة انك تفهمينى أكتر يمكن اقدر اساعدك أكتر

انتى انسانة رائعة وتستحقى كل شىء جميل
ومرة تانية .. شكرا بجد

yamen يقول...

تحياتي للفكرة وللحوار اللامع

الحقيقة دي اول زيارة ليا هنا بس طبعا ده تقصير مني في المتابعة..لكن ملحوقة

ياسمين فعلا زعيمة المدونين..

و حلو ان اول حوار يبقي معاها

بالنسبة لموضوع البلوج المخصوص..انا متهيالي انه مش لازم يعني عشان الحكاية اصلا وسعت جدا والواحد مابقاش عارف يتابع المدونات من كترها

فخليها احسن علي مدونت و كفاية البانر الجميل ده يشد الانظار

تحياتي مرة اخري وسلاماتي لياسمين وليكي

شيماء الجيزى يقول...

ازمرالدا
متشكره لتشريفك ليا
وبشكرك جدا على كلامك ويارب فعلا يكون الحوار عجبك
تحياتى
====================
تامر نبيل
شكرا ليك ، واتمنى تزورنى مره تانيه
تحياتى
==================
ريموو

انا بشكرك على كلامك ده وكل كلمه قولتيها على ياسمين فعلا صح
انا لقيت معايا فى الحوار انسانه لذيذه جدا مرحه لابعد الحدود ناضجه وفاهمه كلامها
وعارفه هى بتقول ايه
وانا كمان متأكده ان كلامها معايا
بيساعدنى كتير

يا ريمو انا فعلا بعتبرك صديقه ليا
لان كلامك فعلا بيمسنى من جوه
اتمنى اننا فعلا نكون صديقات
تحياتى ليكِ

Hany Rizk يقول...

بجد موضوع جميل جدا يا شيماء
وفعلا احنا كمدونين كنا محتاجين حاجة تعرفنا ببعضينا علشان نعرف بعض اكتر
وياريت فكرة جمعية او رابطة المدونين المصريين تتنفذ لانها فعلا حاتلم مجموعة كبيرة جدا من الناس اللى بتتكلم عن كل شئ بيهم البلد

الى الامام دوما يا شيماء وبالتوفيق باذن الله

وربنا يكرمك مع باقى المدونين

شيماء الجيزى يقول...

سفاح كرموز
بشكرك على كلامك
واحجز براحتك بس لازم ترجع تانى
هستناك ...تحياتى
===============
الدكتور
سعيده بتشريفك مدونتى
===============
ياسمين

مشرفانى ديما والاقيكى كل شويه كده عندى
وانتى بجد تستحقى اكتر من الكلام ده
لان ده فعلا فيكِ
والحوار بالعكس ميخوفش ابدا
ده رأيك ومقتنعه بيه
وانا اعتقد انه فعلا صدق كلماتك
عجبت الكل
تحياتى ليكِ
=======================

شيماء الجيزى يقول...

wayfarer
بشكرك على كلماتك الجميله
وربنا يقدم الى فيه الخير
=================
yamen
بشكرك فى زيارتك الاولى ليا ..وده مش تقصير ولا حاجه واديك جيت ونورتنى
وبشكرك بجد على رأيك وكلامك
واتمنى فعلا ان باقى الحوارات تعجبكم
تحياتى
================
brokenheart
هانى
سعيده برأيك الجميل
واتمنى ان كلنا فعلا نحقق احلامنا
مهما كانت ...
واعتقد ان فى اقبال كبير اهو على فكرة الجمعيه
لقيتى الاعضاء يا ياسمين :d
بالتوفيق للجميع
تحياتى
===============

R.R يقول...

احيكى شيماء انتى وياسمين على الحوار الجميل
واحييك على اختيار ياسمين لانها من افضل المدونات

ورشحى نفسك انتى بس وهتشوفى نسبة اختيارك هتبقى اعلى من انتخابات الجمهوريه بس من غير تزوير
د:)

احييك يا شيماء على اسئلتك الجميله الملمه لحاجات كتير

وياريت تخلى الحوار على نفس المدونه كده هيبقى اظرف
تحياتى مره تالته ليكم

harmless يقول...

صحفيتنا الجميلة
احب ان
اقول لكى شيئان
واحييكى ثلاث تحيات
واسئلك اربع اسئلة

اما عن الشيئين
فالاول انى اتابع مدونتك منذ فترة وبالرغم ان لا تعليقات لى عندك ولكنى من معجبينك الصامتين فكما ان بعض المدونين يتكلمون فكذلك بعض المعجبين يصمتون

والشئ الثانى انى كنت اتمنى ان اكون صحفيا واراها من اجمل المهن واكثرها متعه واثاره ولكنى نحوت نحوا آخر فى حياتى للاسف مع عدم فقدانى الاعجاب القديم الجديد بالصحافه والصحفيين

واما عن التحيات الثلاث
فاولا احييكى على الفكره
اقصد فكرة اجراء سلسلة حوارات مع المدونين خاصة بعدما زاد عددهم وبدأ تأثيرهم يظهر فى وسائل الاعلام واحاديث العامه ويبدو ان الموضوع له مستقبل ويبدو ان لكى السبق فى الافكار

والتحية الثانية عن اختيارك ياسمين لاول حوار وهى التى تملك مزايا نادره ليست فقط فى سعة الفكر ورجاحه العقل والصراحه وعدم التصنع والرفق بالمخالفين واعذار المعارضين ولكن ايضا لانها تتكلم من قلبها وتنقل احاسيسها الحقيقيه وتتعامل باخوه مدهشه مع الجميع وحققت فى شهور بسيطه شعبيه لم تتحقق للكثيرين

والتحية الثالثه لاسئلتك المتسلسله المتدرجه المترابطه التى تنم على حرفيه وذكاء

واخيرا عن الاسئله وهى اسئله لفائدتى الشخصيه

الاول
كيف تختارين المدونين الذين تحاوريهم؟
هل من نطاق ما قرأتى؟
هل من خلال من اقنعك؟
هل تسألين وتستقصين عن اراء من تثقين فى ارائهم فربما دلوكى على من لا تعرفينه فتبدأى فى تقييمه؟
ام شئ خلاف هذا؟

والثانى
ما الهدف المسبق الذى تحددينه للحوار؟
هل ابراز رأى المدون فى مواضيع معينه؟
هل تجميع اراءه المشتته فى بوستات متعدده ؟
هل طرح موضوعات فى راسك وتريدين معرفه اراء المدونين المختارين فيها او اعلام القارئين بها او تهيأت الاراء لقبولها؟
ام ماذا؟

والثالث
كيف تعدين الاسئله؟
هل كلها من راسك؟
هل مستوحاه من كتابات المدونين؟
هل تتصلين باصدقائه اولا لمعرفه بعض اتجاهاته ومواقفه حتى تخلقى مساحه اوسع من الاسئله؟
ام ماذا؟

والرابع الاخير
لماذا صحفية مع وقت التنفيذ؟
انتى صحفية رائعه
فماهو التنفيذ اذا؟

اطلت؟
معذره
الحقيقه انى فعلا اريد ان استفيد منك

غير معرف يقول...

فكرة جهنميه اوى يا شوشو
:))
لا بجد حلوة .. خليها فى المدونه احسن بدل الشحططه والتشتيت
:))
بس صحفيه جامده يا بت يا شوشو
اكيد حعملك اعلان بس تقوليلى ازاى..عشان اناعبقرينو شويه
:)))))
سلام يا قمر

micheal يقول...

حوار هايل مع انسانه هاسله بواسطه صحفيه مبشره جدا
بجد مش عارف أقول ايه يا شيماء بس اجد نفسي متفق مع كلام ياسمين و مؤيدا بشده لافكارها و بالذات جممعيه التدوين
تحياتي لكي و لياسمين
هوالندوه بتاعتنا نزلت في مجله كلمتنا؟

~ Bato0ot ~ يقول...

bgd ya shaimaa enty htb2y sa7fya ra2e3a!!
w as2eltek gamila w as3dteny be eny et3rt 3ala shakhsya zay yasmin :D
w i think fekret blog gedid htb2a kwysa y3ni w 3ashan kman mt7rminash mn ur own writings :D m3lsh ana tama3a
yala :) go on ba2a

MoHaMeD HoSSaM يقول...

فكرة رائعة واختيار اروع

بجد عجبتنى الفكرة جدا جدا ويا رب تستمر عالطول وبجد بحييكى عليها يا شيماء

•«ρяoιd»•™ يقول...

الله بجد

صحفيه بجد وبتسأل واحده من اعظم المدونين اللي شوفتهم

اسئلتكغطت كتير من جوانب شخصية ياسمين يا شيماء

تألقتي انتي و ياسمين بجد

تحياتي

nohamy يقول...

بجد فكرة كويسة
برافو عليكي يا شيماء
و الحوار مع شخصية مهمة فى عالم التدوين
تستهال أكتر من حوار

مـحـمـد مـفـيـد يقول...

السلام عليكم
بجد فكره رائعه والاروع انها بدأت بشخصيه زي ياسمين
بجد انا عمري ما قبلتها بس دائما من الناس الممتازين جدا
انا مع فكره المدونه المنفصله

فكره المدونون يتكلمون دي اكثر اكثر من رائعه والي الامام

أسوور يقول...

يامن
زعيمة زعيمة بقى .. مش هأزعل
:))))
أشكرك بجد على المشاركة

أسوور يقول...

brokenheart
معانا يا باشا يعنى فى موضوع الجمعية دة
اكيد الحلم دة لو اتحقق هيبقى بناس زيك مؤمنين بالفكرة وبالتدوين وبضرورة ظهورنا فى حيز شرعى وقانونى
تحياتى

أسوور يقول...

R.R
اشكرك جدا يا رانيا
و اذا كان لية شعبية كدة بقى يبقى الأحسن أرشح نفسى فى انتخابات مجلس الشعب
:))))

شكرا لدعمك بجد .. انتى دايما انسانة جميلة جدا وقلبك حلو قوى وآرائك بتعجبنى وبأتابع دايما تعليقاتك عند أى مدون آخر
مرة تانية .. شكرا

أسوور يقول...

هارملس
ايه دة كله .. ايه دة كله
انا كل دة
كدة هأصدق بقى

شكرا بجد .. انت صديق عزيز وانا مش محتاجة أشرح مشاعرى تجاه صداقتنا لنها واضحة وانت عارف

بس بجد .. بجد بقى
انا هأفرقع من الزهو والفخر والغرور
بسبب الكلام اللى انت كاتبه عنى دة

تقول شعر
:)))

أسوور يقول...

مايكل
صديقى العزيز
طبعا معايا وهتبقى معايا
من الأول لحد ما يبان لنا صاحب
أقصد المدونين طبعا وفكرة الجمعية
وعلى فكرة انت هتمسك اللجنة السياسية لو فكرة الجمعية دى اتنفذت

أسوور يقول...

بطوط
شكرا يا قمر
شكرا يا ست البنات
انا اللى أسعد انى اتعرفت على مدونة جميلة زيك

أسوور يقول...

بنى أدم مع وقف التنفيذ
الله يخليك يا باشا
وكمان أكتر من حوار

طيب .. مسيرك تقع فى ايد شيماء الجيزى وهاتك يا أسئلة بقى
:)
تحياتى

أسوور يقول...

•«ρяoιd»•™
أعظم المدونين؟؟
مين؟؟
أنا؟؟
انت متأكد؟؟
طب هأديك فرصة تراجع نفسك بقى..ماشى

:)))
بجد شكرا

safa7_karmooz يقول...

بجد الاول احييكى على الفكرة

واحييكى برضه على كيفية الاسئلة والطريقة يعنى

واحيييكى اكتر على صاحبة المدونة الرائعه...الرقيقة...ياسمين

بجد انا استمتعت جدا...وانا قاعد ااقرا تخيلت نفسى ماسك جرنال وقاعد ااقرا الحوار فيه باستمتااع شديد

ااحيكى بجد

وانا دووقتى عرفت حاجات عن ياسمين ....ضفتها للموسوعه اللى مكتوبة عنها ...:)

شيماء الجيزى يقول...

طبعا انا بشكر ياسمين انها تبنت الردود على الموضوع فى غيابى
وانا داخله النهارده قولت كل دى ردود
لقيت تلات تربع الردود منها :d
بحملك انا فوق طاقتك يا ياسمين
انا بجد بشكرك جدا
تحياتى

شيماء الجيزى يقول...

r.r

انا الى بشكرك على كلماتك الجميله وبحييكى انتى..
وياريت ترشح نفسها ...هيقبلوها على طول :d
بالتزكيه
تحياتى

شيماء الجيزى يقول...

harmless
الصديق الصامت
هارملس
سعيده باشيائك وفرحه بتحياتك
ومصدومه بأسئلتك
اما سعادتى
فهى لوجود معجبين صامتين لمدونتى وهذا يعطينى امل فى ان قلة الردود هى اتمنى ان تكون متساويه مع الردود الصامته
اما الشئ الثانى وهى ميولك الصحفيه وتمنياتك بمزاولتها رغم ان ما يكدرك وجعلك تتراجع هو ما جعلنى
(صحفيه مع إيقاف التنفيذ)
اما فرحى
عن تحياتك فلقد ألممت مفردات الحوار كلها وقدمت لى التحية عليها
زادنى خجلاً وفرحاً
فتقبل تحيتى على تحياتك
اما صدمتى
فيا الصديق الصامت
قلت فى اشيائك ان لك ميولاً صحفيه لقد قلت
والشئ الثانى انى كنت اتمنى ان اكون صحفيا واراها من اجمل المهن واكثرها متعه واثاره ولكنى نحوت نحوا آخر فى حياتى للاسف مع عدم فقدانى الاعجاب القديم الجديد بالصحافه والصحفيين

فاعتقد بكلماتك هذه انك تعرف ان اسئلتك تعنى ان ابوح بأسرار المهنه
انك تدخل فى اعماق تفكيرى وتسحب معطيات حوارى لتعلم بها ولست وحدك من ستعلم بل الجميع؟
اظن ان حتى ياسمين لم تسألنى ؟
فكيف لى ان اجب عن ثلاث من الاسئله تشرح فيهم بإختصار مجمل الفكرة والحوار؟
اعذرنى واسمحلى ...لن اجيب على الثلاثه
فقط آخر اسئلتك
واجابتى تتمثل فى بضع كلمات ارجو ان تتفهمها
"تنفيذى من عدمه لا يكمن فى العمل البحت
لكن يكمن فيما يمليه على ضميرى
يكمن فى داخل اعماق تفكيرى ..حينها اقول
لقد تم تنفيذى "
لك منى كل الشكر والتحيات
على كلماتك الرائعه
وارجو ...ان تعذرنى
وتسمحلى ...انا من يريد الاستفاده
فلقد اصبحت نقطه فى كتابى التنفيذى
تحياتى

شيماء الجيزى يقول...

شيماء
والله انا مش عارفه اشكرك ازاى
حطيتى الاعلان عندك ..محدش تانى عاملها لما قولتله :(
هههههههههه
بشكرك يا شيمو اوى بجد
ربنا يخليكى

شيماء الجيزى يقول...

مايكل

بحييك على كلماتك الجميله
والندوة منزلتش ومتسألنيش ليه
تحياتى

شيماء الجيزى يقول...

بطوطه
ازيك يا عقد الفل
:d
انا بشكرك جدا وبحييكى على كلماتك دى
وكويس ان الحوار عرفك شخصيه زى ياسمين
الى تستحق ان الجميع يعرفها
تحياتى

شيماء الجيزى يقول...

محمد حسام
انا بشكرك وسعيده ان الفكره عجبتك
واتمنى ان الحوار الجاى يعجبك
تحياتى

شيماء الجيزى يقول...

•«ρяoιd»•™
رامى

ايه السعادة الى انا فيها دى؟
رامى عندى
يا رامى انا بشكرك جدا جدا على كلامك
والابداع ده فى احساسك
قولتهالك قبل كده؟
تحياتى ليك

شيماء الجيزى يقول...

بنى ادم مع وقف التنفيذ

تهامى عندى؟
يا مرحبا يا مرحبا
نورك غطى ع الكهربا
:d
ان تهامى يقول الكلام ده عليا
يبقى ...انا نجحت
عشان عارفه انه مش بيقول اى كلام كده
:d
بشكرك بجد يا محمد على كلامك ده
تحياتى

شيماء الجيزى يقول...

محمد مفيد

اهلا بزيارتك الاولى عندى
وبشكرك على كلماتك الجميله
واتمنى ان المدونون يتكلمون يكون ديما عند حسن ظنك
تحياتى

شيماء الجيزى يقول...

سفاح كرموز

كلاكيت تانى مره :d

كنت بتقرا جورنال؟
ياااه انا حققت المعادله الصعبه
هو ده الى كنت اقصده
انصحك
اطبعها وامسكها زى الجورنال
:d
اسسسستوب
تحياتى يا سفاح
اتمنى تيجى كل شويه
عشان نعيد المشهد
:d

dandana يقول...

هايل....
الموضوع هايل....
استمتعت جدا....

ياسمين واضح انها حد مثقف جدا...
وكلامها فيه منطقية كبيرة..

انا عن نفسى موافقة على جمعية المدونين ماعتقدش ان فيه ناس كتير ممكن تعارض...

صدقينى هاتلاقى اكتر من مجرد 10 موافقين...

الحوار متنوع اوى ....شئ جميل...

مجهود رائع يا شيماء...واجابات ممتعة يا ياسمين

شيماء الجيزى يقول...

دندنه

شكرا ليكِ جدا على كلامك
وجميل انك متفقه مع ياسمين
بشكرك جدا على اعجابك بالفكره
تحياتى

أسوور يقول...

شيماء الجميلة
معلش انى انفعلت وتفاعلت وغصب عنى لقيتنى بأرد على الناس الحلوة اللى داخلة تقول كلام أحلى عنى

احنا كلنا ضيوفك يا قمر

ومظاهرة الحب اللى انتى السبب فيها دى تساوى عندى ملايين .. بل مليارات .. بل لا يوجد فى العالم شىء يوازيها

متابعة التعليقات برضه ومستنية الحوار اللى جاى

ويا ترى هيبقى مع مين؟؟؟؟؟

شيماء الجيزى يقول...

ياسمين

كل ده كلام؟
على ايه كل المدونين هنا صحاب بيوت
انا معرفش انك مجامله؟
ايه هتبقى مجامله معايا؟
ربنا يخليكى يا قمر ويسعدك ويهنيكى
ويخليلك بناتك يارب
انتى منورانى فى اى وقت
تحياتى

غير معرف يقول...

أسجل حضور وأكتفى بالمشاهده :)

hosnysoliman يقول...

الاستاذة/احسنت فكرة جميلة تجعل للاشياء معنى وهدف..وارى ان يكون لهذه الفكرة مدونة مستقلة حتى لا نحرم من مقالات الخاصة..وكذلك حتى تكون هناك مساحة للتعليق الحر..اشكرك مرة اخرى واحييك

غير معرف يقول...

ياسمين تستاهل كل خير

Van Gogh يقول...

جميلة جداً الفكرة..والأجمل التنفيذ
واضح انك صحفية..مش محتاجة تنفيذ
خليها فى مدونة منفصلة..هتكون الذ مدونة..اخيراً..دى اول مرة ليا هنا بس اكيد مش الأخيرة

الدبور يقول...

فكرة حلوة
هو الدور اللي جاي علي مين ؟
انا مش كده ؟
انا سمعت حاجه زي كده من مصادر موثوقه

واحـــد مـــــن الـنـــاس يقول...

فكرة جميلة جدا جدا

وياريت بجد تتعمل مدونة مخصوصة لكده

بس انا مش مع فكرة جمعية للمدونين دي

ba7re يقول...

الحوار جميل جدا و مكتمل الاركان
و الضيف كان جرئ و صادق فى ردوده
و طبعا لانى مدون مش بسعى لخروج مدونتى و انتشارها لان ده مش اساس فكرتى فى التدوين
فمعرفش مدونة ياسمين
و لما دخلت قريتها دلوقتى قبل لما ارد
استوقفى جدا موضوع الطلاق الناجح
خاصة الرسالة دى
http://amyasser.blogspot.com/2007/04/blog-post_22.html
مش عارف مش مقتنع نهائيا بوجهة النظر دى
و اكيد هعمل موضوع خاصة بكده فى مدونتى الاجتماعية جوازة كده و اول لما اجهزه هقول للاستاذة يا سمين تزوره لنتناقش فيه
المهم انا رأيى ان الطلاق فشل فاكيد مفيش حاجة اسمها الطلاق الناجح
و تحياتى للمحاور على اسالته المميزة التى استطعت ان تغطى كل التساؤلات
و تحياتى للاستاذ ياسمين على صراحتها و لباقتها فى الحوار
و سلام :)

غير معرف يقول...

مدونة منفصلة

شيماء الجيزى يقول...

على حسن

كنت اتمنى تعلق على الفكره والموضوع
واعتقد انها تستحق حتى النقد
انا مش عاوزاك تشكر فيا بس تناقشنى
تتكلم معايا وتقول العيوب الى شوفتها والمميزات
على العموم
سعيده بحضورك
تحياتى

شيماء الجيزى يقول...

Sharm

اعتقد ان تعليقك هيعجب ياسمين بالتأكيد وانا بشكرك بالنيابه عنها

شيماء الجيزى يقول...

Van Gogh

شكرا لكلامك الجميل ، والتنفيذ من عدمه بحاول اظهره
تمنياتى بنهار جميل
تحياتى

شيماء الجيزى يقول...

الدبور
:d
لا مش عليك :p
خليك كده لغايت متشوف الحوار الجاى
مش هقولك
سعيده بتشريفك ليا
واتمنى تشرفنى تانى
تحياتى

شيماء الجيزى يقول...

واحد من الناس

سعيده بتشريفك
وجميل ان الفكره عجبتك
واما نشوف النتيجه لمدونه منفصله ولا هنا
فى الاخر بقى

تحياتى

شيماء الجيزى يقول...

بحرى

متشكره ليك جدا على كلامك
واعتقد مناقشتك تكون فى رد على الموضوع عند ياسمين
لان هنا انا سألتها مجموعة اسئله مش على الطلاق الناجح فقط
اشكرك مره تانيه
تحياتى

شيماء الجيزى يقول...

نبيذ
شكرا

وكنت اتمنى ان اسمع رأيك فى الحوار والموضوع
والاسئله
تحياتى

شيماء الجيزى يقول...

hosnysoliman

الاستاذ حسنى سليمان
اشكرك جدا على رأيك
واتمنى عندما اوجهه لك الدعوه ...تقبلها بصدر رحب
تحياتى لك

حسام مراد يقول...

فكره جامده جدا
وحوار جامد مع مدونه كتابتها جميله اوى
واستمرى للامام
يا
سلاااااااااااااااااااااااااااام

gohayna يقول...

اول زياره ليا عندك

واكيد انا خسرانه كتير اوي

بس ملحوقه وهتزهقي من وجودي عندك

اولا فكرتك جديره بالحترام

وذات جمالا باختيارك لياسمين لتزين اول حوار مع رئيسه المدونين العرب

ودا المنصب خلاص

بجد انسانه وعيه وفكرها راجح واسلوبها بيعجبني وتفكيرها عاقل

بجد فكره تحفه ياشيماء وجديده كمان

وبعدين انتي صحفيه مع ايقاف التنفيذ؟؟؟
امال لو نفذتي هتعملي ايه؟

تسلم ايدك يا شيماء

تحياتي

حصان بري يقول...

مصغره الفونت قوي يا شيماء
انا اتعميت بس قريته للاخر
بس بجد حوااار هايل
ليه بس مع ايقاف التنفيذ دانتي محاوره هايله
والفكره كمان رائعه

شيماء الجيزى يقول...

حسام مراد
يا سلام على ده كلام
بشكرك اوى على كلامك الجميل ده
واتمنى ان باقى الحوارات تعجبك
تحياتى

شيماء الجيزى يقول...

جهينه

والله كلامك ده مقدرش عليه ..خسرانه ايه بس ده انا حتت مدونه غلبانه
انتى الى مدونتك روعه انا بزورها كتير
بس زى مبيقولوا انا من المدونون الصامتون
اشكرك على مدحك وجميل ان الفكره والحوار عجبك واتمنى بجد بقيت الحوارات تعجبك
ياسمين انسانه جديره بكل شئ جميل
اكتشفت معاها العقل الواعى المفكر
الحكمه والنضج الفكرى
ليها نظره للمواضيع تستحق فعلا الاحترام
انا لما انفذ هفرقع الفراقيع :d
يا سيدتى تنفيذى يأتى تباعاً من خلال مدونتى العزيزه
اكتب فيها ما يمليه على ضميرى
اتمنى ان انفذ على صفحات الجرائد
كما يراه تفكيرى
تحياتى لكِ
انتى الى هتزهقى منى بعد كده :d

شيماء الجيزى يقول...

حصان برى

والله انا تعبت من موضوع الفونت ده
اريد حالاً
هشوف حل عشان خاطرك وخاطرى انا كمان
عشان مبشوفش :d
بس انا مقدره تعبك انك شوفت الموضوع رغم صغر الخط
وعجبك كمان
بجد سعيده بكده
واتمنى ان باقى الحوارات ان شاء الله تعجبك
تحياتى

Marwa Friday يقول...

أشكرك يا شوشو كثيرا لتشريفك مدونتي المتواضعة
فكرة الحوارات هايلة
ربنا معاكيييي وتبقى صحفية مع الشغل والنفاذ!!!!!!!!!!! ا

شيماء الجيزى يقول...

مروة جمعه

سعيده انا كمان انى اكتشفت مدونتك اللذيذه الجميله
وسعيده بتشريفك عندى
وسعيده بإن المدونون يتكلمون عجبك
تلاته سعيده
:d
تحياتى يا مروة

غير معرف يقول...

بجد حوار هايل موت موت
ياسيمين دي انسانة هايلة
انا سعيد بالفكرة
والحوار
والشخصية
والاسئلة
ربنا معاكي يا شيماء

شيماء الجيزى يقول...

مصطفى فتحى

انا سعيده جدا جدا انى اسمع الكلام ده منك
من صحفى شاطر وجميل زيك
اتمنى ليك التوفيق ديما يا مصطفى
انت شخص تستحق كل خير
تحياتى

عمرو غريب يقول...

لا والله حوار رائع رائع واتمني لكي التوفيق

ibn nasser - ابن ناصر يقول...

حوار رائع رائع ..وموضوع هايل
تحياتي

شيماء الجيزى يقول...

عمرو غريب

شكرا لزيارتك وسعيده بإن الحوار عجبك
وبتمنى التوفيق للجميع
تحياتى

شيماء الجيزى يقول...

ibn nasser - ابن ناصر

اشكرك على كلماتك الجميله
تحياتى لك

shabfa2re يقول...

بجد برافو عليكى
فكرة جديدة وحوار جاااااااااامد

.:.-=- ELGaZaLy-=-.:. يقول...

ممتاز يا شيماء بجد موهبة جميلة بجد

ربنا يكرمك

وحلو الحوار وممتع بس للاسف مكملتهوش للنهاية هعلق علية مرة تانبة ان شاء الله

تحياتى وامنياتى لكى بالتوفيق

شيماء الجيزى يقول...

shabfa2re

كلامك حلو بس يارب ميكونش مجامله
تحياتى

شيماء الجيزى يقول...

.:.-=- ELGaZaLy-=-.:.

بشكرك كتير واتمنى انك تكمل الحوار وتيجى تقول رأيك بصراحه
انا سعيده بتعليقك جدا
تحياتى

Shiko يقول...

حوار جميل وفكرة اجمل
اتمنى لها الاستمرار
ياريت تقدرى تعملى بلوج خاص بالحوارات دى كاملة بدل ما تبقى بوستات متفرقه
تحياتى لكى

reri يقول...

الحوار جميل يا شيماء ... وفكرة مدونه للحوارات هتبقي جميله برده ... وهتخليني نعرف بعض أكتر
بس كنتي تقولي يا ياسمين علشان أشوفك في البيت بيتك

سلاماااااااااااااات يا شيمو

شيماء الجيزى يقول...

Shiko

سعيده بزيارتك وشكرا ليك لكلامك الجميل
وحاضر انا عملت استطلاع الرأى ده عشان اعرف
الى يعجبكم لان الحوار ده منى لكل المدونين
شكرا ليك ويارب الزياره تتكرر
تحياتى

شيماء الجيزى يقول...

reri

ريرى :)

ايه الجمال ده كله والله منورانى
وياستى شكرا على الكلام الحلو ده وحاضر تحت امرك
امرك نافذ يا جميل :d

سلامات يا قمر

عمر عاشق القرآن يقول...

أكثر من رائع !!!

متهيألى نزلى الحوارات فى نفس البلوج أحسن

مش كتر بلوجات وخلاص .. ولا اكمنها ببلاش؟؟؟

شيماء الجيزى يقول...

omar مشروع بطل

متشكره على كلامك
واما نشوف بإذن الله هيكون ايه
وليه منستلهاش وهى ببلاش
مش يمكن يجى يوم وتبقى بفلوس؟
:d
تحياتى

صاحب البوابــة يقول...

فكرة رائعة للغاية

واجابات ياسمين نموذجية تماما

:)

تدل على طيبتها ورقتها

تحياتي

غير معرف يقول...

جميله جدا الفكره دى
اتمنى انى ابقى صديق ليكم
لأنكم فعلا اسره جميله جدا
واقلامكم كلها احساس
انا اول مره ازور البلوجايه دى
وبرده اول مره ازور بلوجايه الاستاذه ياسمين
بس بجد بلوجات بمعنى الكلمه
شكرا ليكم على الحوار العثل ده

شيماء الجيزى يقول...

صاحب البوابــة

اعتذر انى مردتش فى وقتها بس مشوفتش التعليق الا دلوات

سعيده بتعليقك واتمنى تعلق فى باقى الحوارات
تحياتى

شيماء الجيزى يقول...

lovestory

شكرا ليك اوى وانت بلوجتك حلوة موت

تحياتى ومرحب بيك فى كل وقت